ইচু
মাক জীয়েকৰ মাজত কিছুদিনৰ পৰা তুমুল কাজিয়া৷মাকৰ মতে জাৰাই প্ৰতিমুহূৰ্ততে গিৰিয়েকৰ প্ৰতিটো কথাত জেদ কৰা৷উভতি উভতি যুজ কৰা মুঠেই ভাল কাম কৰা নাই৷
-ছোৱালীয়ে নহয় এখন ঘৰৰ বোৱাৰী জাৰা৷ইমান জেদলৈ সংসাৰ কৰিবলৈ আহিছে৷কিনো চাই আছে জানো কবীৰে৷ঠিকেই কৰিছিল তালাক দি দিদিছিল৷আকৌ নিকাহ হালালা কৰিব কিয় লাগিছিল
তপককৈ জীয়েকে মাত লগালে
-এহ কলেই হব৷কবীৰনো কোনচা ভাল৷বাপেক ককায়েকৰ ঘটনৰ ওপৰত চলি আছে৷কি বাহাদুৰি৷ভালেই কৰিছে জাৰাই৷কিয় নকব ঘটি আনিবলৈ৷
-আহিছিল কিয় বিয়াহৈ ঘটিবই লাগে যদি৷আগেয়ে কি গম পোৱা নাছিল নেকি মৰতীয়ে৷
-এহ তেনেকৈ নকবা দেই৷তোমালোকৰ নিচিনা মাক বাপেকৰ সন্মুখত তাই ক’ত মাত মাতিব পাৰে৷নহওঁ বুলি কৈছিল দেখুন ৷তাহাঁতে জোৰকৈ তাইক কবীৰলৈ বিয়া সোমাবলৈ বাধ্য কৰাইছে৷
-আও তোৰ আজিকালি মুখ বৰ চলিছে৷জাৰাৰ পৰা সেইসোপা শিক্ষা লৈছ৷
যুদ্ধই তুংগত অৱতাৰণ কৰা দেখি দেউতাকে ভিতৰৰ পৰা ওলাই আহি টিভিটো বন্ধ কৰি দিলে৷মাক জীয়েক এইবাৰ দেউতাকৰ ওপৰত জাঙুৰ খাই উঠিল৷মাক গুৰগুৰাই উঠিল
-কি হে !টিভিটো কিয় অফ কৰিলে?কিবা এটা চাই থকা দেখা নাই নেকি?
-দেউতা যে কি! ক্লাইমেক্স চলি আছে সেইটো সময়তে টিভিটো অফ কৰিব পালে৷
তহঁতে শান্তিৰে কাজিয়া খন কৰ বুলিহে টিভিটো বন্ধ কৰিলোঁ৷কাজিয়াই ক্লাইমেক্স পোৱা দেখি বাবই কলে বোলে দেউতা টিভিটো অফ কৰি দিয়ক৷সেইটো চলি থকাৰ কাৰণে ইহঁত দুজনীয়ে কাজিয়াখনত ভালকৈ মনোযোগ দিব পৰা নাই চাগৈ৷মাজেমাজে মনেমনে থকা শুনিছোঁ৷মইও চালোহি কথাটো নোহোৱা নহয় টিভিৰ জনীয়ে তোমালোকতকৈ মুখখন বেচিকৈ জোকাৰি কথাকৈ তোমালোকৰ ৰস ভংগ কৰি আছে সেই গতিকে৷
 কথা শেষ হবলৈকে নেপালে জীয়েক দুপদুপাই ওলাই গ'ল৷মাকেও বাপেকলৈ ঘুপাকৈ চাই টিভিটো লগাই ললে৷
দেউতাকে মিনমিনাই কলে
-মই আক’ নিউজটো চাও বুলিছিলো দেশত নো কি হৈ আছে৷
-এহ কি হবলৈ আছে আৰু৷যি হবলৈ আছে সেইয়াই হৈছে৷দেখিছো নহয় সৈ একেই কেইটা মানুহ চুটবুট কচি আহি চকীখনত বহি কাজিয়া কৰি আছে৷আৰু কি কৰিব৷কি যে আপোনালোক ভাবি নাপাওঁ৷এই নিউজসোপা চাই কি পাই নাজানো৷
দেউতাকে বুজিলে টিভি চোৱাৰ আশা বাদ দিয়াই ভাল৷এখুজি দুখুজিকৈ টিভিটোৰ ওচৰৰ পৰা তেওঁ আঁতৰি আহিল৷
-মাজনী চাহ একাপ দে অ৷
-মই নোৱাৰোঁ দেই৷চিৰিয়েলত সদায় মাকবোৰে চাহ বনাই দেখিছো নহয়৷মাক কব নোৱাৰা নেকি আব্বা?
-এহ মাৰকনো কি কম !
-"আব্বা"?মোক  কেতিয়াৰ পৰা তই আব্বা কবলৈ ললি অ আই৷হব শুনি বেয়া লগা নাই পিচে৷
-কিয় জাৰাই কোৱা শুনা নাই নেকি কিবা৷চাহৰ কথা মাক নকলা যে৷মায়ে কি কৰিছে আব্বা?
-মাৰ এতিয়া কিবা কুমকুমজনীৰ বিয়াত ব্যস্ত হৈ আছে৷মাজেমাজে নাতিনীজনীও উমলাইছে৷
-ইয়ে মোক আগেয়ে নকলা কিয় ?কুমকুম ভাগ্য দিলেই নেকি?কুমকুমৰ ছোৱালীজনী ইম্মান কিউট ন পাপা?
-"পাপা" মুখৰ ভিতৰতে আঁওৰালে দেউতাকে৷
ইতিমধ্যে জীয়েকে যৰে বস্তু ততেই পেলাই মাকৰ কাষতে চোফাত বহি ললে৷
দেউতাকে চাহৰ কাৰণে পানীটো পাতি দি মুখৰ ভিতৰতে ক’লে
-চেহ জাৰাৰ কাজিয়াখনৰ বা কেতিয়া অন্ত পৰে৷পৰিব জানো অন্ত৷আকৌ বা কাজিয়া কৰিবলৈ কি ইচু ওলিয়াই লয়?কুমকুমৰ বিয়াৰ পৰা  বা এওঁলোক কেতিয়া উভতে?কুমকুমৰ বিয়াখন হৈ গলেও জানো নিস্তাৰ পাম৷তাৰ পিছত তাহাঁতৰ ল’ৰা ছোৱালীৰ বিয়া তাৰ পিছত নাতি পুতিৰ বিয়া তাৰ পিছত তাৰ পিছত৷
মুৰটো ঘুৰোৱা যেন লাগিল দেউতাকৰ৷অহ তাৰমানে ভাতৰ চৰুটো তেওঁলৈকে উভতি আহি থাকিব আৰু মাজনী -মাকৰ কাজিয়া খনো নতুন নতুন ইচুলৈ হৈয়ে থাকিব৷দীঘল হুমুনিয়াহ এটা ওলাই আহিল দেউতাকৰ মুখৰ পৰা৷তেওঁ সাজু হ'ল৷দেউতা ,আব্বা ,পাপা আৰু তাৰ পিছত বা কি তালৈ৷